Burcad-badeed Soomaali ah ayaa lagu soo warramayaa inay afduubteen markab shidaal oo ka diiwaangashan Eritrea, kaas oo marayay xeebaha Yemen, iyagoo markii dambe u jiheeyay dhanka xeebaha Puntland.
Markabka M.T. Sibu 1 ayaa la sheegay in lix nin oo hubeysan ay qabsadeen Khamiistii, xilli uu ku sugnaa qiyaastii 252 kiiloomitir bariga magaalada Al-Mukalla ee Yemen.
Markabka waxaa saarnaa 20 shaqaale ah, oo ay ku jiraan 16 Hindi ah, hal Suuriyaan ah, hal Suudaani ah iyo hal Ciraaqi ah, halka jinsiyadda qofka 20-aad aan la xaqiijin.
Sibu 1 ayaa sidoo kale waxaa saaran cunaqabateyn uu Mareykanku horay ugu soo rogay, iyadoo Waaxda Maaliyadda Mareykanka ay ku eedeysay inuu qeyb ka yahay waxa loogu yeero Maraakiib qarsoodi ah oo Iran u adeegsato dhoofinta shidaalka iyo ka dhuumashada cunaqabateynta Mareykanka.
Afduubka markabkan ayaa yimid saddex maalmood kadib markii burcad-badeeddu ay gacanta ku dhigeen markabka xamuulka ee Lutuf oo ka dhacay meel ka baxsan xeebaha Soomaaliya.
Sida laga soo xigtay xogta la helayo, burcad-badeedda Soomaalida ayaa tan iyo 21-kii Abriil afduubtay lix markab oo ganacsi, taasoo muujineysa soo laabashada weerarrada burcad-badeednimada ee Gacanka Cadmeed iyo Badweynta Hindiya.
Maamulka Puntland ayaa sheegay in kooxaha ka dambeeya falalkan aysan ka amar qaadan hay’adaha Puntland, balse aan la shaacin cidda ay yihiin.