Guddiga Qaranka ee Tacliinta Sare ee Soomaaliya ayaa magaalada Muqdisho ka furay kulan wada-tashi ah oo soconaya laba maalmood, kaas oo ay la yeelanayaan madaxda jaamacadaha dalka, laguna lafo-gurayo siyaasadda, istaraatiijiyadda, iyo heerarka cusub ee lagu qiimayn doono tayada tacliinta sare ee dalka.
Guddoomiyaha Guddiga Qaranka ee Tacliinta Sare, Maxamuud Axmed Jimcaale, ayaa shaaciyay in la diyaariyay ilaa 200 oo qodob iyo halbeegyo adag oo lagu cabbiri doono tayada jaamacadaha.
Nidaamkan cusub ayaa ka koobnaan doona is-qiimayn ay jaamacadaha qudhoodu samaynayaan, booqashooyin kormeer iyo xaqiijin ah oo guddigu ku tagayo xarumaha waxbarashada, iyo hubin qoto-dheer oo lagu samaynayo sax ahaanshaha shahaadooyinka iyo isu-dhiggooda tacliimeed.
Si kastaba ha ahaatee, guddigu wali ma uusan shaacin xilliga rasmiga ah ee heerarkan cusubi ay dhaqan-gali doonaan, nooca tallaabooyinka sharciga ah ee laga qaadi doono jaamacadaha ku guuldarraysta inay buuxiyaan shuruudaha qiimaynta, iyo in natiijooyinka kama-dambaysta ah ee jaamacadaha loo soo bandhigi doono bulshada guud.