Xaaladda magaalada Baydhabo ayaa haatan lagu soo warramayaa inay inta badan degan tahay, kaddib dagaal culus oo aroornimadii maanta ka dhacay qaybo ka mid ah magaalada iyo duleedkeeda.
Ciidamada Dowladda Federaalka Soomaaliya ayaa sheegay in ay magaalada ka saareen xoogaggii weerarka soo qaaday, kuwaas oo dowladda iyo Koonfur Galbeed ay ku eedeeyeen inay ahaayeen maleeshiyaad taageersan madaxweynihii hore ee Koonfur Galbeed, Cabdicasiis Laftagareen, isla markaana ay sheegtay inay ku jireen xubno ka tirsan Al-Shabaab.
Eedeynta xiriirka Al-Shabaab iyo xoogagga Laftagareen weli waxaa jira dhinacyo diidan, mana jirto xaqiijin madax-bannaan oo buuxda.
Dagaalka oo saacado ka socday xaafado iyo waddooyin ku yaalla gudaha iyo daafaha magaalada ayaa sababay in dad rayid ah ay dhaawacmaan, iyadoo dhaawacyada loo kala qaadayo xarumaha caafimaadka ee magaalada.
Wararka hadda soo baxaya ayaa sheegaya in rasaas goos-goos ah weli laga maqlayo qaybo ka mid ah Baydhabo, hase yeeshee xaaladdu ay ka deggan tahay sidii ay ahayd saaka.
Ciidamada dowladda iyo kuwa Koonfur Galbeed ayaa wada howlgallo lagu baacsanayo xoogaggii ka baxay magaalada.
Sidoo kale, warar hordhac ah ayaa sheegaya in dad labada dhinac ka tirsan ay ku dhinteen iska horimaadka, balse tirada saxda ah iyo khasaaraha guud ayaan weli si rasmi ah loo shaacin.