Sida ay baahisay CNN Arabic iyo war rasmi ah oo kasoo baxay Wasaaradda Arrimaha Gudaha ee Boqortooyada Sucuudiga, waxaa dil toogasho (xukun dil ah) lagu fuliyay saddex muwaadin oo Soomaaliyeed, kuwaas oo lagu helay inay dalkaas soo geliyeen maandooriyaha xashiishadda.
Wasaaraddu waxay sheegtay in xukunnada dilka la fuliyay kaddib markii ay soo mareen dhammaan heerarka garsoorka, islamarkaana uu ansixiyay amarka ugu dambeeya ee boqortooyada.
Saddexda muwaadin ee la dilay ayaa magacyadooda lagu kala sheegay:
Axmed Aadam Cabdoo Ibraahim
Axmed Maxamuud Ismaaciil Cabdiraxmaan
Maxamuud Cabdiraxmaan Ibraahim Xasan
Magacyada saddexdan nin ayaa si rasmi ah loogu daabacay bogga Wasaaradda Arrimaha Gudaha ee Sucuudiga, taas oo sheegtay in lagu helay dambiga tahriibinta xashiishadda gudaha dalka.
Fulintan ayaa ku soo beegmaysa xilli ay dowladda Sucuudigu sii xoojisay ololaheeda ka dhanka ah tahriibinta maandooriyaha, gaar ahaan xashiishadda laga soo geliyo dhanka Yemen.
Dowladda Sucuudiga ayaa marar badan ku celcelisay in qof kasta oo lagu helo tahriibinta mukhaadaraadka uu wajahayo ciqaabta ugu adag ee sharciga dalkaas dhigayo.