Hawlgalka ciidamada badda ee Midowga Yurub (EU NAVFOR Operation ATALANTA) ayaa baaritaan ku haya wararka sheegaya in kooxo burcad-badeed Soomaali ah ay afduubteen doon kalluumeysi oo laga leeyahay dalka Iiraan, taas oo lagu qabtay xeebaha waqooyi-bari Soomaaliya.
Sida lagu sheegay digniin ay soo saaray Xarunta Ammaanka Badaha ee Badweynta Hindiya (MSCIO), doonta oo lagu magacaabo Azini ayaa la sheegay in la afduubtay 29-kii Oktoobar 2026, abaare 09:00 xilliga UTC.
Xaruntu waxay 31-kii Oktoobar soo saartay digniin ku saabsan dhaqdhaqaaqa doonta, iyadoo sheegtay inay ku sii dhowaanaysay marin ay maraan maraakiibta ganacsiga.
Waxaa sidoo kale laga digay suuragalnimada in doonta loo adeegsado saldhig ay burcad-badeeddu ka abaabulaan weerarro kale oo ka dhan ah maraakiibta.
Si kastaba ha ahaatee, MSCIO ma aysan xaqiijin in doonta Azini loo adeegsaday weerarro burcad-badeednimo, mana jirto xog rasmi ah oo caddeyneysa xaaladda shaqaalaha saaran ama cidda ka dambeysay afduubka.
Warbaahinta Puntland Post ayaa si gaar ah u sheegtay in dhacdadu ka dhacday xeebaha degmada Banderbayla ee gobolka Bari, ayna doonta saarnaayeen laba qof oo Soomaali ah oo ilaalinayay.
Dhanka kale, Xarunta MSCIO ayaa ugu baaqday maraakiibta ganacsiga ee ka howlgala agagaarka xeebaha Soomaaliya inay sare u qaadaan feejignaantooda, raacaan tilmaamaha amniga badaha, isla markaana soo sheegaan dhaqdhaqaaq kasta oo shaki leh.
Haddii la xaqiijiyo in doonta loo adeegsanayo saldhig ay burcad-badeeddu ka abaabulaan weerarro, waxay kordhin kartaa khatarta ka jirta marin-biyoodka ay maraan maraakiibta ganacsiga ee xeebaha Soomaaliya.
Hawlgalka ATALANTA ayaa weli baaraya dhacdadan, iyadoo aan ilaa hadda la xaqiijin weerarro kale oo ka dhashay afduubka doonta, waxaana dhacdadani ay dib u soo nooleynaysaa walaaca laga qabo amniga maraakiibta ganacsiga ee mara Badweynta Hindiya iyo xeebaha Soomaaliya, xilli hay’adaha amniga badaha ay si dhow ula socdaan dhaqdhaqaaqyada looga shakisan yahay burcad-badeednimada.