Faahfaahin dheeraad ah ayaa kasoo baxaysa afduubka markabka kalluumeysiga ee Azini, oo laga leeyahay dalka Iiraan, kaas oo koox burcad-badeed hubeysan ay dhowaan ku qabsadeen xeebaha waqooyi-bari Soomaaliya, iyadoo xilliga la afduubayay ay saarnaayeen 23 qof.
Sarkaal ka tirsan Ciidanka Booliska Badda Puntland (PMPF) ayaa wakaaladda wararka ee Associated Press (AP) u sheegay in markabka ay qabsadeen 12 burcad-badeed ah, xilli uu marayay inta u dhexeysa deegaannada Bandar Bayla iyo Xaafuun ee gobolka Bari.
Sarkaalka ayaa xaqiijiyay in markabka ay saarnaayeen 21 shaqaale oo u dhashay Iiraan iyo laba ilaalo oo Soomaali ah, xilli maamulka Puntland iyo dowladda Iiraan midkoodna uusan faahfaahin ka bixin xaaladda dadka la afduubtay.
Xarunta Ammaanka Badaha Badweynta Hindiya (MSCIO) ayaa xaqiijisay in markabka Azini la afduubtay 29-kii Oktoobar 2026, abaare 9:00 subaxnimo xilliga caalamiga ah, ilaa haddana lama hayo xog rasmi ah oo ku saabsan xaaladda 23-ka qof ee saarnaa markabka, mana cadda in xiriir lala sameeyay.
Dhanka kale, MSCIO ayaa soo saartay digniin amni oo ku saabsan jihada uu markabku u socday, iyadoo ka digtay in burcad-badeeddu ay markabka u adeegsan karaan saldhig ay ka abaabulaan weerarro ka fog xeebaha Soomaaliya.
Isticmaalka markab weyn oo saldhig u noqda burcad-badeedda ayaa u sahli kara inay muddo dheer ku sugnaadaan badda, isla markaana ay doonyo yaryar uga fuliyaan weerarro ka dhan ah maraakiibta ganacsiga ee isticmaala Badweynta Hindiya.
Hawlgalka Midowga Yurub ee la dagaallanka burcad-badeedda, EU NAVFOR Atalanta, ayaa baaraya dhacdadan, waxaana maraakiibta ku sugan aagga lagu boorriyey inay muujiyaan feejignaan dheeraad ah, isla markaana soo sheegaan dhaqdhaqaaq kasta oo laga shakiyo.
Afduubka markabka Azini ayaa dib u soo nooleynaya walaaca laga qabo soo laabashada falalka burcad-badeednimada ee xeebaha Soomaaliya, kuwaas oo khatar ku ah amniga maraakiibta ganacsiga iyo isu socodka badeecadaha ee marinnada muhiimka ah ee badda.